Bioqrafiya

Eyyub Zəkəriyyə oğlu Yaqubov 26 aprel 1965-ci ildə Bakı şəhəri Bayıl qəsəbəsində anadan olmuşdur. Özünün ilk təhsilini 49 saylı orta məktəbdə almışdır. Musiqiyə olan böyük maraq onun eyni zamanda 3№-li musiqi məktəbində oxumağı ilə əks olunur. 8 illik təhsilini orta məktəbdə bitirdikdə, 1980-ci ildə o Asəf Zeynallı adına Musiqi Texnikumunun fortepiano sinifinə daxil olur. Eyyubun ilk arzusu musiqiçi olmaq idi. O, heç zaman təsəvvürünə belə gətirə bilməzdi ki, nə zamansa gələcəkdə müğənni olacaq.

Texnikumda oxumaqla yanaşı o, Əlibaba Məmmədovun rəhbərlik etdiyi "Xumayun" xalq instrumental ansamblında pianoçu işləyirdi. Bu ansambl ilə o, Azərbaycanın bütün regionlarında keçirilən konsertlərdə iştirak edirdi.

Hələ məktəbli olaraq, 3 saylı musiqi məktəbinin 7-ci sinif şagirdi Azərbaycan pianoçuları arasında keçirilən müsabiqədə birinci yeri tutmuşdur. Əlibaba Məmmədovun ansamblında işləyərək, klassik musiqi ilə yanaşı Eyyub xalq musiqisini də öyrənirdi. Dostları və tanışları əhatəsində olaraq o hərdən mahnılar oxuyurdu. Musiqiçi olmaq arzusunda olan pianoçu Eyyub, bu fikirdən uzaqlaşır. Musiqiçilərimizin zəhmətinin layiqincə qiymətləndirilməməsini görən gənc, müğənni olmaq qərara qəlir.

Erkən yaşlarından dost-tanış arsında tez-tez müğənnilik edərək o, zaman ötdükcə bu incəsənət növünün incəliklərinə yiyələnirdi. Bu insan xüsusi ilə köhnə Bakının küçə mahnılarının vurğunu idi. Mahnı oxumaq həvəsi heç də maddi maraq güdməkdən irəli gəlmirdi. Eyni zamanda, təmiz ürəkdən gələn bu arzu onu biraz da ruhlandırdı. Özünün dediyinə görə o, "blatnoy" mahnılar oxumağa başladı. Zamanın tələbləri ilə addımlayaraq, restoranlada oxumağa başladı.

1992-ci ildə ailə qurur, Zakir adlı bir oğlu var.

Öz ifa tərzini məşhurluq kimi qiymətləndirən pianoçu-müğənni Eyyub Yaqubov, bu sənətə musiqiyə olan həvəs və dostlarının səyi nəticəsində gəlmişdir. Onun yaradıcılığına ilham duyğuları və məhəbbət həyacanları da güclü təsir etmişdir.

1992-ci ildən etibarən populyarlıq qazanır. Həmin zamandan bəri 4 audio-kasset və 3 kompakt-disk buraxmışdır. Bunlar 1999-cu ildə çıxmış "Duet Amburan" və "Mister Əlibala", 2000-ci ildə - "Ağabala Çaykovski", 2001-ci ildə - "Ana". 3 mahnısına - "Ana", "Kor ərəbin mahnısı" və "Mənə dəniz verin" mahnılarına kliplər çəkdirib.